ជួបជាមួយអ្នកបង្កើតពុម្ពអក្សរយូនីកូដខ្មែរលោកដាញ់ ហុង
កាលពីថ្ងៃ ២៦ កក្កដា និង ថ្ងៃ ១៧ សីហា ឆ្នាំ២០០៨ នេះ ខ្ញុំនិងប្អូនជីដូនមួយខ្ញុំឈ្មោះ វឌ្ឍនា មានកិត្តិយសដ៏អស្ចារ្យដោយបានជួបជាមួយអ្នកបង្កើតពុម្ពអក្សរខ្មែរអូអេសយូនីកូដដ៏ល្បីល្បាញ គឺលោកដាញ់ ហុង នៅ Deli Café។
ក្នុងការជួបគ្នាទាំងពីរលើកនេះ លោកបងដាញ់ ហុង បានជួយណែនាំបង្ហាត់បង្រៀនពីរបៀបធ្វើពុម្ពអក្សរខ្មែរ ដល់វឌ្ឍនា លោកបឿន និង ខ្ញុំផងដែរ ដោយគ្មានលាក់លៀមចំណេះបន្តិចសោះឡើយ។ គាត់បានបង្រៀនឲ្យចេះប្រើឧបករណ៍ទាំងអស់ក្នុងកម្មវិធី Font Creator និង Microsoft VOLT ។ ក្រៅពីនេះផងដែរ យើងក៏បានជជែកគ្នាពីបញ្ហានានាទាក់ទងនឹងប្រវត្តិនៃការកកើតពុម្ពអក្សរខ្មែរលើកុំព្យូទ័រ, វិបត្តិនៃអក្សរសាស្ត្រខ្មែរ និងបច្ចេកវិជ្ជាកុំព្យូទ័រ។
មិនគ្រាន់តែជាអ្នកបង្កើតពុម្ពអក្សរដែលមានកេរ្តិ៍ឈ្មោះល្បីរន្ទឺប៉ុណ្ណោះទេ លោកដាញ់ ហុង ក៏ជាអ្នកសារព័ត៌មានដ៏មានវិជ្ជាជីវៈមួយរូបរបស់វិទ្យុអាស៊ីសេរីផងដែ។ ពុម្ពអក្សរនៅលើវិបសាយត៍របស់វិទ្យុនេះ គឺគាត់ជាអ្នករៀបចំ។
Mr. Danh Hong and Vathana
សូមថ្លែងអំណរគុណយ៉ាងជ្រៀលជ្រៅចំពោះលោកបងដាញ់ ហុង ដែលបានចំណាយពេលវេលាដ៏មានតម្លៃ ក្នុងការចែកចាយចំណេះដឹងរបស់បងចំពោះប្អូន។ សូមជូនពរឲ្យបងជួបប្រទះតែសេចក្ដីសុខគ្រប់ប្រការ និងទទួលបានជោគជ័យក្នុងការងារជាបន្តទៀត។
សូមអរគុណផងដែរដល់លោកបឿន ដែលនាំឲ្យមានការណាត់ជួបនេះ។ បញ្ជាក់៖ នៅលើកទីពីរក៏មានណារដ្ឋ ចូលរួមផងដែរ។
អត់ហៅខ្ញុំទៅចូលរួមផងសោះ!!
ហៅមិនទាន់ ព្រោះកាលជួបលើកទីមួយនោះ ខ្ញុំអត់បានដឹងទេ ដល់ពេលជុំគ្នា ទើបបងហុងតេប្រាប់ និងពេលក្រោយ រវល់ផងអីផងក៏ភ្លេចទៅ។
បើមានលើកក្រោយ ចាំខ្ញុំហៅទៅទាំងអស់គ្នាតែម្ដង ព្រោះខ្ញុំក៏ចង់ស្គាល់តារាប្លក់ទាំងអស់ដែរ។
សូមជំរាប ដាញ់ហុង
នៅពេលនេះខ្ញុំទើបតែដឹងហុងជាអ្នកបង្កើត font UNICODE Khmer
តើអាចចែករំលែកពីរបៀបបង្កើតពុម្ពអក្សរយូនីកូដ ដោយប្រើកម្មវិធីទាំងនោះដែរឬទេ? សូមអរគុណ!
ការបង្កើតពុម្ពអក្សរទាំងនេះ មានលក្ខណៈស្មុគស្មាញ និង ទាមទារការអត់ធ្មត់ណាស់។ លោកអាចទាក់ទងទៅបងហុងដោយខ្លួនឯងតាមរយៈលេខទូរស័ព្ទរបស់គាត់ 011 73 15 40។
ការទំនាក់ទំនង តាមទូរស័ព្ទពិតជាពិបាកខ្លាំងណាស់។ បច្ចុប្បន្ន ខ្ញុំបានមករស់នៅឯខេត្តបន្ទាយមានជ័យឯណោះ។ អ្វីដែលខ្ញុំចង់បាននាពេលនេះ គឺគ្រាន់តែបានការពន្យល់ជាអត្ថបទ របៀបជាសៀវភៅដែលអាចឱ្យអ្នកសិក្សារៀនដោយខ្លួនឯងបានប៉ុណ្ណោះ។ ខ្ញុំកំពុងតែខំស្វែងទំព័រដែលពន្យល់អំពីការបង្កើតពុម្ពអក្សរ តែនៅតែមិនទាន់រកបានលទ្ធផលនៅឡើយ។ ប្រសិនបើមាន សូមមេត្តាជួយប្រាប់ផង។ ប្រសិនបើ មានឱកាសឡើងទៅភ្នំពេញ បើមានសំណាងសង្ឃឹមថានឹងបានជួបលោកដាញ់ ហុង និងអ្នកបង្កើតពុម្ពអក្សរខ្មែរយូនីកូដផ្សេងទៀតផងដែរ។